Наведванне асфальтавага завода ў Гарадоцкім ДРБУ № 106
Упраўленнем па працы, занятасці і сацыяльнай абароне Гарадоцкага райвыканкама сумесна з УА "Сярэдняя школа № 1 г. Гарадка ім. І.Х. Баграмяна" было арганізавана наведванне асфальтавага завода ў Гарадоцкім ДРБУ № 106, у рамках прафарыентацыйнага мерапрыемства. Экскурсія стала для дзяцей выдатнай магчымасцю даведацца больш аб сучаснай вытворчасці і пазнаёміцца з прафесіямі, звязанымі з дарожнай галіной.
Падчас наведвання школьнікам распавялі пра тое, як вырабляецца асфальтабетонная сумесь, якія матэрыялы выкарыстоўваюцца ў рабоце і як ажыццяўляецца кантроль якасці прадукцыі. Хлопцы ўбачылі вытворчыя пляцоўкі, спецыяльную тэхніку і абсталяванне, а таксама даведаліся, якую важную ролю асфальтавы завод адыгрывае ў будаўніцтве і рамонце дарог.
Асаблівую цікавасць у дзяцей выклікаў аповяд аб розных прафесіях: інжынера, тэхнолага, лабаранта, аператара вытворчай ўстаноўкі, механіка і кіроўцы спецыяльнай тэхнікі. Дырэктар Гарадоцкага ДРБУ №106 Кузьміч А.Ч. распавёў, якія веды і навыкі неабходныя для кожнай з гэтых спецыяльнасцяў.
Наведванне завода было пазнавальным і карысным. Хлопцы змаглі ўбачыць работу прадпрыемства знутры, пашырыць свае ўяўленні аб свеце прафесій і пераканацца ў тым, што будаўніцтва і ўтрыманне дарог — гэта вынік працы многіх спецыялістаў.
