У Віцебскай вобласці стартавала дабрачынная акцыя "Ад усёй душы"
Віцебская вобласць далучылася да рэспубліканскай дабрачыннай акцыі "Ад усёй душы". Яна адрасавана прадстаўнікам старэйшага пакалення. Старт эстафеце святочных мерапрыемстваў дала ўрачыстасць у абласной філармоніі "Сагрэем цяплом душы сваёй".
Больш за 300 прадстаўнікоў залатога ўзросту прыбылі на яго з усіх куткоў Віцебшчыны. Ледзь пераступаючы парог філармоніі, госці траплялі ў святочную атмасферу: папулярныя мелодыі мінулых гадоў выконваў ансамбль народных інструментаў. На памяць аб радасных сустрэчах госці фатаграфаваліся ў яркіх лакацыях. Працавалі выстава-кірмаш устаноў сацыяльнага абслугоўвання, інтэрактыўныя пляцоўкі партнёраў, кафэ.
– Дзве акцыі – "Нашы дзеці" і "Ад усёй душы", якія паралельна ідуць у гэтыя дні ў Беларусі, сімвалізуюць сувязь пакаленняў, пацвярджаюць, што ў нашай краіне памятаюць пра ўсіх грамадзян, ад малога да вялікага, - звярнуўся да ўдзельнікаў мерапрыемства намеснік старшыні аблвыканкама Вячаслаў Дурноў. Акцыя "Ад усёй душы" накіравана на тое, каб прыйсці ў кожны дом. Бо ў нас больш за 140 тыс. самотна пражываючых і больш за 20 тыс. адзінокіх грамадзян пенсійнага ўзросту. Да таго, каб стварыць ім свята, падключаюцца прадпрыемствы і ўстановы, дзе яны працавалі, грамадскія арганізацыі, моладзь.
Старшыня камітэта па працы, занятасці і сацыяльнай абароне аблвыканкама Барыс Яфрэмаў паведаміў, што цяпер на Віцебшчыне пражывае больш за 308 тыс. атрымальнікаў пенсій, ён выказаў упэўненасць, што святочная хваля, якая ўзнялася ў філармоніі, дойдзе да кожнага раённага цэнтра, установы сацыяльнай абароны, аграгарадка і вёскі. Яе мэта - праява ўвагі і клопату да пажылых грамадзян.
Каб жыць даўжэй, трэба жыць ярчэй!
