Дзяржаўныя сімвалы
У адпаведнасці з Канстытуцыяй Рэспублікі Беларусь Дзяржаўны сцяг, Дзяржаўны герб і Дзяржаўны гімн з'яўляюцца сімваламі суверэнітэту краіны.
Іх выкарыстанне рэгламентавана законам "Аб дзяржаўных сімвалах Рэспублікі Беларусь" ад 5 ліпеня 2004 г. № 301-З са зменамі і дапаўненнямі, прынятымі ў 2006, 2007, 2009, 2015 і 2021 гг.
У апошнюю рэдакцыю абноўленага закона ўнесены эталонныя выявы сцяга і новыя каляровыя версіі герба. Таксама з улікам сучасных эстэтычных уяўленняў і магчымасцяў, якія з'явіліся ў мастакоў дзякуючы камп'ютарным тэхналогіям, шэраг элементаў герба прамаляваны больш дэталёва. Пры гэтым ідэалагічны змест дзяржаўных сімвалаў Беларусі застаецца нязменным.
Грамадзяне Рэспублікі Беларусь, а таксама замежныя грамадзяне і асобы без грамадзянства, якія знаходзяцца на тэрыторыі Рэспублікі Беларусь, абавязаны паважліва ставіцца да Дзяржаўнага сцяга Рэспублікі Беларусь, Дзяржаўнага герба Рэспублікі Беларусь і Дзяржаўнага гімна Рэспублікі Беларусь.
У Беларусі ўсталявана дзяржаўнае свята - Дзень Дзяржаўнага сцяга, Дзяржаўнага герба і Дзяржаўнага гімна Рэспублікі Беларусь, які адзначаецца штогод у 2-ю нядзелю мая.
Дзяржаўны сцяг Рэспублікі Беларусь
Дзяржаўны сцяг Рэспублікі Беларусь уяўляе сабой прамавугольнае палотнішча, якое складаецца з дзвюх гарызантальных каляровых палос: верхняй – чырвонага колеру і ніжняй – зялёнага колеру. Суадносіны шырыні палос чырвонага і зялёнага колеру - 2:1. Суадносіны шырыні Дзяржаўнага флага Рэспублікі Беларусь да яго даўжыні - 1:2. Каля дрэўка вертыкальна размешчаны беларускі нацыянальны арнамент чырвонага колеру на белым полі, якое складае 1/9 даўжыні Дзяржаўнага флага Рэспублікі Беларусь.
Дзяржаўны сцяг Рэспублікі Беларусь мацуецца на дрэўку (флагштоку), афарбоўваемым у залацісты (охра) колер. Адносіны шырыні Дзяржаўнага флага Рэспублікі Беларусь да даўжыні дрэўка - 1:3.
Дзяржаўны герб Рэспублікі Беларусь
Дзяржаўны герб Рэспублікі Беларусь уяўляе сабой размешчаны ў сярэбраным полі залаты контур Дзяржаўнай граніцы Рэспублікі Беларусь, накладзены на залатыя промні ўзыходзячага над зямным шарам сонца. Уверсе поля знаходзіцца пяціканцовая чырвоная зорка. Герб апраўлены вянком з залатых каласоў, пераплеценых справа кветкамі канюшыны, злева - кветкамі лёну. Вянок тройчы перавіты з кожнага боку чырвона-зялёнай стужкай, у сярэдняй частцы якой у аснове Дзяржаўнага герба Рэспублікі Беларусь у два радкі напісаны золатам словы "Рэспубліка Беларусь".
Дзяржаўны герб Рэспублікі Беларусь можа адлюстроўвацца ў шматколерным, двухколерным і аднакаляровым (сярэбраным і залатым) малюнку. Выпадкі размяшчэння шматколернай, двухколернай і аднакаляровай (сярэбранай і залатой) выявы Дзяржаўнага герба Рэспублікі Беларусь вызначаюцца заканадаўствам.
Дзяржаўны гімн Рэспублікі Беларусь
Дзяржаўным гімнам Рэспублікі Беларусь з'яўляецца твор на музыку Нестара Сакалоўскага і словы Міхаіла Клімковіча і Уладзіміра Карызны.
Дзяржаўны гімн сучаснай Беларусі захаваў музычную аснову гімна Беларускай Савецкай Сацыялістычнай Рэспублікі. Музыка Нестара Сакалоўскага карысталася папулярнасцю і павагай людзей розных пакаленняў, таму і пры стварэнні гімна незалежнай Беларусі было прынятае рашэнне яе захаваць. Потым быў аб'яўлены конкурс на стварэнне тэксту гімна.
Словы Дзяржаўнага гімна адлюстроўваюць умовы развіцця Рэспублікі Беларусь як суверэннай, міралюбнай дзяржавы, падкрэсліваюць патрыятызм і працавітасць грамадзян, брацкія адносіны паміж прадстаўнікамі ўсіх нацыянальнасцяў, якія пражываюць на тэрыторыі краіны.
